DAR ES SALAAM.
Kampuni ya Mawasiliano ya Tigo Tanzania leo imetangaza mabadiliko makubwa kwa kubadili jina lake kutoka "TIGO" na sasa inajulikana kwa jina jipya la YAS. Mabadiliko haya pia yameathiri bidhaa yake maarufu ya huduma ya malipo, TIGO PESA, ambayo kuanzia sasa itajulikana kama MIXX BY YAS. Hii ni hatua nyingine kubwa katika safari ya kampuni hiyo ambayo imekuwa na mafanikio makubwa kwenye sekta ya mawasiliano nchini Tanzania.
Mabadiliko hayo yaliwasilishwa rasmi katika hafla fupi iliyoandaliwa Jijini Dar es Salaam leo mchana, ambapo Mgeni rasmi alikuwa ni Waziri wa Habari, Mawasiliano na Teknolojia ya Habari, Jerry Silaa. Akiongea katika hafla hiyo, Waziri Silaa alisisitiza kuwa hatua hii ni muhimu katika kuonyesha mabadiliko ya kimkakati yanayoendana na mahitaji ya soko la mawasiliano na teknolojia, na kwamba inatoa fursa kwa kampuni hiyo kuendelea kuboresha huduma zake kwa wateja wake.
Hii sio mara ya kwanza kwa kampuni hii kufanya mabadiliko ya jina, kwani katika kipindi cha miaka thelathini ya huduma bora nchini Tanzania, Tigo imebadilisha majina kadhaa. Awali, kampuni hii ilijulikana kama Mobitel (Buzz), kisha ikabadilishwa na kuwa Tigo, na sasa imetangaza jina jipya la YAS. Mabadiliko haya yanaashiria juhudi za kampuni hiyo kuendana na mabadiliko ya soko, na kutafuta namna bora ya kufikia wateja wake katika mazingira ya kidijitali.
YAS imejizatiti kutekeleza mikakati ya kisasa, na inatarajia kuleta mapinduzi zaidi katika huduma za mawasiliano na fedha, hasa kupitia huduma ya MIXX BY YAS, ambayo inatarajiwa kuleta mabadiliko chanya katika sekta ya malipo ya simu. Huduma hii itatoa fursa kwa wateja wa YAS kuendelea kufurahia huduma za kifedha kwa urahisi zaidi, huku ikiendana na mitindo ya kidijitali inayoshika kasi duniani.
Kwa wateja wa YAS, mabadiliko haya yanakuja na faida nyingi. Kwanza, huduma zote za zamani za TIGO PESA zitaendelea kutolewa, lakini kwa jina jipya la MIXX BY YAS, huku kampuni ikiendelea kutoa huduma za kifedha, mawasiliano, na burudani kwa ubora na ufanisi zaidi. Watumiaji wanatakiwa kufahamu kuwa mabadiliko haya yatakuja na baadhi ya maboresho ya kiufundi na kifedha ambayo yatafaidi wateja wote wa huduma hii.
Kwa hiyo, wateja wa YAS wategemee kupata huduma bora zaidi, za kisasa na kwa ufanisi mkubwa zaidi kupitia jina jipya na huduma mpya za MIXX BY YAS. Kampuni inasema itaendelea kutoa taarifa zaidi kuhusu mabadiliko haya na kuendelea kuboresha huduma zake ili kutimiza malengo ya kuwa kampuni inayoongoza kwa huduma bora nchini Tanzania.
Hakuna maoni: