DAR ES SALAAM.
Msanii na mtangazaji maarufu, Baba Levo, ameanzisha rasmi umoja wa Online TV utakaowaleta pamoja waendeshaji wa vyombo vya habari vya kidigitali ili kushirikiana kwa karibu katika kutafuta maslahi yao. Umoja huo unalenga kuwapa wanachama wake nguvu ya pamoja katika sekta ya habari mtandaoni, kuhakikisha wanapata haki zao, na kuimarisha tasnia hiyo kwa ujumla.
Mbali na hilo, Baba Levo pia ameanzisha kampeni maalum yenye jina "Mama Hana Deni", inayolenga kutambua na kuonesha mafanikio ya Rais Samia Suluhu Hassan katika kipindi cha miaka minne ya uongozi wake. Kupitia kampeni hiyo, Baba Levo na timu yake watafanya ziara katika zaidi ya mikoa 14 nchini, wakifuatilia na kuangazia miradi yote iliyotekelezwa na inayoendelea kutekelezwa chini ya uongozi wa Rais Samia.
"Tutakuwa na safari kwa zaidi ya mikoa 14, tutakwenda kwa pamoja kwenda kuangazia yale yote yaliyotekelezwa na Rais Samia," alisema Baba Levo akielezea dhamira ya kampeni hiyo.
Mikoa itakayopitiwa katika awamu ya kwanza ya kampeni hii ni Mwanza, Geita, Kigoma, Arusha, Kilimanjaro, Katavi, na Dar es Salaam. Katika ziara hizi, Baba Levo na timu yake watakuwa wakifanya mahojiano na wananchi, viongozi wa serikali, na wadau mbalimbali ili kupata tathmini ya moja kwa moja kuhusu athari za miradi hiyo kwa jamii.
Hii ni kampeni ya kipekee inayolenga kutoa uhalisia wa maendeleo kwa wananchi kwa mtazamo wa vyombo vya habari vya kidigitali. Pia, inaleta hamasa ya kutambua juhudi zinazofanywa na serikali katika kuwaletea wananchi maendeleo.
Kwa mujibu wa Baba Levo, kampeni hii haitahusisha tu Online TV, bali pia itashirikisha waandishi wa habari wa mitandao ya kijamii, vloggers, na influencers mbalimbali ili kuhakikisha taarifa hizi zinawafikia Watanzania wengi zaidi.
Kwa wadau wa sekta ya habari za kidigitali, hii ni fursa ya kushirikiana na kuonesha mchango wao katika kuelimisha jamii kuhusu maendeleo ya nchi. Umoja wa Online TV nao unatarajiwa kuwa chachu ya kuimarisha sekta ya habari mtandaoni kwa kuweka mikakati imara ya pamoja.
#mama_hana_deni #baba_levo #onlinetv #maende
leo #rais_samia
Hakuna maoni: