Dar es Salaam.
Wananchi wanaotembelea banda la Ofisi ya Waziri Mkuu katika Maonesho ya 50 ya Kimataifa ya Biashara (Sabasaba) wameendelea kunufaika na mfumo wa One Stop Center, ambao umewezesha huduma mbalimbali za TAMISEMI kutolewa sehemu moja bila kulazimika kutembelea ofisi tofauti.
Akizungumza baada ya kukagua banda hilo, Naibu Waziri wa Nchi, Ofisi ya Waziri Mkuu – Tawala za Mikoa na Serikali za Mitaa (TAMISEMI), Dkt. Jafar Seif, alisema mfumo huo umeongeza kasi ya utoaji wa huduma na kurahisisha wananchi kupata majibu ya changamoto zao kwa wakati.
Alieleza kuwa kupitia kituo hicho, wananchi wanapata huduma mbalimbali zinazohusu TAMISEMI, ikiwemo ushauri kuhusu elimu, masuala ya watumishi, ujenzi, vibali pamoja na huduma nyingine zinazoratibiwa na mamlaka za serikali za mitaa.
Aidha, alisema wataalamu kutoka idara na taasisi mbalimbali wamewekwa katika eneo moja ili kutoa maelezo, kupokea malalamiko na kuwaunganisha wananchi na wahusika pale inapohitajika, hatua inayopunguza muda na gharama za kufuatilia huduma.
Dkt. Seif alibainisha kuwa banda hilo pia linatoa elimu kupitia taasisi zilizo chini ya Ofisi ya Waziri Mkuu zinazohusika na masuala ya hifadhi ya jamii, watu wenye ulemavu, mapambano dhidi ya dawa za kulevya na huduma nyingine za ustawi wa jamii.
Amesema ushiriki wa Ofisi ya Waziri Mkuu katika maonesho hayo unalenga kupeleka huduma karibu na wananchi, kuongeza uelewa wa majukumu ya taasisi zake na kuhakikisha changamoto zinazowasilishwa zinapatiwa ufumbuzi kwa ufanisi.
Pia aliwataka wananchi kutumia muda uliobaki wa Maonesho ya Sabasaba kutembelea banda hilo ili kupata huduma, elimu na ufafanuzi kuhusu huduma mbalimbali zinazotolewa na TAMISEMI pamoja na taasisi zake.
Hakuna maoni: