DAR ES SALAAM, Oktoba 5, 2026.
Soko la Hisa la Dar es Salaam (DSE) limeendelea kufanya vizuri katika robo ya tatu ya mwaka 2026, likirekodi ongezeko kubwa la mtaji wa soko, faharisi za hisa pamoja na thamani ya miamala ya hisa.
Takwimu hizo zimetolewa leo, Oktoba 5, 2026, katika mkutano na wanahabari uliofanyika katika Ukumbi wa Mikutano wa Soko la Hisa la Dar es Salaam, Exchange Tower, NHC Morocco Square.
Taarifa hiyo imewasilishwa na Mkurugenzi wa Fedha wa DSE, Bwana Lucas Sinkala, kwa niaba ya Afisa Mtendaji Mkuu wa Soko la Hisa la Dar es Salaam, akishirikiana na Afisa Mkuu wa Fedha, Ndg. Peter Situmbeko Nalitolela.
Kwa mujibu wa taarifa hiyo, hadi kufikia Septemba 30, 2026, thamani ya mtaji wa kampuni 28 zilizoorodheshwa katika Soko la Hisa la Dar es Salaam ilifikia TSh trilioni 40.6.
Kiwango hicho ni ongezeko la asilimia 90.3 ikilinganishwa na kipindi kama hicho mwaka 2025, ambapo thamani ya mtaji wa soko ilikuwa TSh trilioni 21.34.
Kwa upande wa kampuni 22 za Kitanzania zilizoorodheshwa sokoni, thamani ya mtaji ilifikia TSh trilioni 28.10, kutoka TSh trilioni 13.55 katika kipindi kama hicho mwaka jana.
Hii ni sawa na ongezeko la asilimia 107.4, likionyesha kuimarika kwa thamani ya kampuni za ndani katika soko la mitaji nchini.
Katika kampuni zilizoorodheshwa, NMB Bank Plc iliendelea kuongoza kwa kuwa na thamani kubwa zaidi ya mtaji sokoni, ikifikia TSh trilioni 10.35 mwishoni mwa robo ya tatu ya mwaka.
NMB ilifuatiwa na CRDB Bank Plc, iliyofikisha thamani ya mtaji wa TSh trilioni 7.70.
Taarifa hiyo pia imeonyesha kuongezeka kwa faharisi mbalimbali za soko, zinazoonyesha mwenendo wa bei na thamani ya hisa zilizoorodheshwa.
Faharisi Jumuishi ya DSE (DSE All Share Index – DSEI), inayopima mwenendo wa kampuni zote 28 zilizoorodheshwa, ilifikia alama 4,654.22 mwishoni mwa robo ya tatu ya mwaka 2026.
Hii ni ongezeko la asilimia 86.9 ikilinganishwa na alama 2,489.70 zilizorekodiwa katika kipindi kama hicho mwaka 2025.
Wakati huo huo, Faharisi ya Hisa za Tanzania (Tanzania Share Index – TSI), inayopima mwenendo wa kampuni 22 za Kitanzania zilizoorodheshwa, ilifikia alama 10,339.85, kutoka alama 5,118.80 mwaka jana.
Hilo ni ongezeko la asilimia 80.88.
Kwa mujibu wa taarifa, ukuaji huo umechangiwa kwa kiasi kikubwa na ufanisi wa kampuni za sekta ya benki zilizoorodheshwa katika soko, hususan NMB Bank Plc, CRDB Bank Plc na KCB Bank Plc.
Faharisi ya Sekta ya Benki, Fedha na Uwekezaji (Banking, Finance and Investment Index – BI) nayo ilipanda hadi alama 23,382.10, kutoka alama 9,245.90 katika kipindi kama hicho mwaka 2025.
Hii ni ongezeko la asilimia 152.89.
Katika upande wa soko la dhamana, thamani ya hatifungani za Serikali zilizoorodheshwa katika DSE ilifikia TSh trilioni 33.47 hadi kufikia mwisho wa Septemba 2026.
Kiwango hicho ni ongezeko la asilimia 17.19 ikilinganishwa na TSh trilioni 28.56 zilizokuwa zimeorodheshwa hadi mwisho wa Septemba 2025.
Kwa upande wa hatifungani na dhamana za Sukuk za kampuni binafsi na taasisi za umma, thamani ya dhamana zilizoorodheshwa kwa fedha za Kitanzania ilifikia TSh trilioni 1.741.
Hii ni ongezeko la asilimia 46.70 ikilinganishwa na TSh trilioni 1.187 zilizorekodiwa katika kipindi kama hicho mwaka jana.
Aidha, dhamana hizo zilizoorodheshwa kwa fedha za kigeni zilifikia Dola za Marekani milioni 186.05, kutoka Dola milioni 153.74 mwaka jana.
Hilo ni ongezeko la asilimia 21.02.
Mifuko ya Uwekezaji wa Pamoja Iliyoorodheshwa (Exchange Traded Funds – ETF) nayo imeendelea kukua katika soko la DSE.
Hadi kufikia mwisho wa robo ya tatu ya mwaka 2026, thamani ya mtaji wa ETF zilizoorodheshwa sokoni ilifikia TSh bilioni 238.
ETF ni bidhaa mpya katika soko la DSE, ambapo ETF ya kwanza iliingizwa sokoni mwezi Oktoba 2025 baada ya Vertex ETF kuorodheshwa tarehe 16 Oktoba 2025 ikiwa na thamani ya awali ya TSh bilioni 6.8.
Katika upande wa ukwasi wa soko, thamani ya miamala ya hisa katika robo ya tatu ya mwaka 2026 ilifikia TSh bilioni 824.08.
Kiwango hicho ni ongezeko la asilimia 231.214 ikilinganishwa na TSh bilioni 248.64 zilizorekodiwa katika robo ya tatu ya mwaka 2025.
Wastani wa thamani ya miamala ya hisa kwa siku katika robo hiyo ulikuwa TSh bilioni 8.96.
Ongezeko hilo linaashiria kuimarika kwa shughuli za biashara ya hisa na kuongezeka kwa ushiriki wa wawekezaji katika soko.
Thamani ya miamala ya hatifungani za Serikali, kampuni binafsi, taasisi za umma pamoja na dhamana za Sukuk katika robo ya tatu ya mwaka 2026 ilifikia TSh trilioni 1.419.
Kiasi hicho ni pungufu kwa asilimia 12 ikilinganishwa na TSh trilioni 1.617 zilizorekodiwa katika robo ya tatu ya mwaka 2025.
Hata hivyo, kwa kuangalia kipindi cha miezi tisa ya kwanza ya mwaka, yaani Januari hadi Septemba 2026, thamani ya miamala hiyo iliongezeka kwa asilimia 5.76.
Thamani hiyo iliongezeka kutoka TSh trilioni 4.128 katika miezi tisa ya kwanza ya mwaka 2025 hadi TSh trilioni 4.366 katika kipindi kama hicho mwaka 2026.
Kwa upande wa ETF, thamani ya miamala katika robo ya tatu ya mwaka 2026 ilifikia TSh bilioni 28.7.
Katika kipindi kama hicho mwaka 2025, bidhaa ya ETF ilikuwa bado haijaingia katika soko la DSE.
Kwa ujumla, mwenendo wa Soko la Hisa la Dar es Salaam katika robo ya tatu ya mwaka 2026 unaonyesha ukuaji mkubwa katika maeneo muhimu ya soko.
Ongezeko la mtaji wa soko hadi TSh trilioni 40.6, kupanda kwa faharisi za DSEI, TSI na BI, pamoja na ongezeko kubwa la thamani ya miamala ya hisa, vinaonyesha kuimarika kwa shughuli za soko na thamani ya kampuni zilizoorodheshwa.
Wakati huohuo, ukuaji wa soko la hatifungani na kuendelea kupanuka kwa bidhaa mpya kama ETF unaongeza wigo wa fursa za uwekezaji katika soko la mitaji nchini Tanzania.
Hakuna maoni: