BUKOMBE/GEITA.
Kampuni ya ESAP Mining Services imewekeza katika uzalishaji wa vimiminika vya vilipuzi na teknolojia za kisasa za uchimbaji madini nchini, hatua inayolenga kuongeza upatikanaji wa huduma hizo na kupanua ushiriki wa kampuni za kizalendo katika sekta ya madini.
Akizungumza Oktoba 2,2026 Katika Maonesho ya Tisa ya Kitaifa ya Teknolojia ya Madini yanayoendelea Katika Viwanja vya Dkt.Samia Suluhu Hassan Mkoani Geita ,Mkurugenzi wa kampuni hiyo, Mhandisi Yahya Ruyaga, amesema ESAP imejikita katika usambazaji wa vilipuzi na utoaji wa huduma za uchorongaji, huku ikiendelea kuhudumia migodi mikubwa pamoja na wachimbaji wadogo na wa kati katika maeneo mbalimbali nchini.
Amesema uwekezaji huo unatekelezwa kupitia kiwanda cha kampuni kilichopo Wilaya ya Bukombe, ambako huzalishwa vimiminika maalumu vinavyotumika katika mifumo ya vilipuzi, sambamba na matumizi ya magari maalumu yenye teknolojia ya kuchanganya vilipuzi katika maeneo ya kazi.
Kwa mujibu wa Ruyaga, matumizi ya teknolojia hiyo ni sehemu ya jitihada za kampuni kuboresha huduma za uchimbaji na kuongeza uwezo wa kampuni za ndani kushiriki katika shughuli zinazohusiana na sekta ya madini.
Ameeleza kuwa ESAP inahudumia migodi mbalimbali, ikiwemo Bulyanhulu, Shanta Mining, Siam Gold (Samagold) na Nyanzaga, ambako pia kampuni hiyo inatoa huduma za uchorongaji.
Mbali na migodi mikubwa, kampuni hiyo imeelekeza nguvu zake katika kuwahudumia wachimbaji wadogo na wa kati, hususan katika Ukanda wa Ziwa, ambao wanahitaji huduma na teknolojia zinazolingana na mahitaji ya shughuli zao.
Katika hatua nyingine, Ruyaga amesema kampuni hiyo ipo kwenye mazungumzo na kampuni za nje kwa lengo la kupata mashine ndogo za kisasa zitakazorahisisha matumizi ya mifumo ya vilipuzi katika uchimbaji wa chini ya ardhi.
Amesema mpango huo unalenga kuwezesha upatikanaji wa teknolojia inayoweza kusaidia kupunguza gharama za huduma kwa wachimbaji wanaofanya shughuli zao chini ya ardhi, ingawa utekelezaji wake utategemea kukamilika kwa mazungumzo na taratibu husika.
Hatua hiyo inalenga kupanua wigo wa huduma za kitaalamu kwa wachimbaji wadogo na wa kati, ambao wanahitaji teknolojia inayoweza kukidhi mazingira na gharama za shughuli zao.
Akizungumzia ukuaji wa kampuni hiyo, Ruyaga amesema sera ya maudhui ya ndani (Local Content) imechangia kuweka mazingira ya kampuni za wazawa kushiriki katika uwekezaji na utoaji wa huduma kwenye sekta ya madini.
Ameishukuru Serikali, ikiwemo Wizara ya Madini, kwa jitihada za kuweka mazingira ya uwekezaji, akisema hatua hizo zimechangia kampuni hiyo kuwekeza katika teknolojia na uzalishaji nchini.
Kwa upande wa uchumi, uwekezaji wa kampuni za ndani katika huduma zinazohusiana na uchimbaji unaweza kuongeza nafasi ya wazawa kushiriki katika mnyororo wa thamani wa madini, pamoja na kuimarisha uwezo wa kutoa huduma zinazohitajika na migodi.
Hata hivyo, ukubwa wa mchango huo utategemea uwezo wa kampuni kuongeza uzalishaji, kupanua huduma, kuendeleza teknolojia na kukidhi mahitaji ya soko kwa kuzingatia sheria na viwango vya usalama vinavyosimamia matumizi ya vilipuzi.
Kupitia uwekezaji wake wa Bukombe na mipango ya kupata mashine ndogo za kisasa, ESAP inalenga kupanua huduma zake na kuongeza nafasi ya kampuni za kizalendo katika sekta ya madini, huku wachimbaji wadogo na wa kati wakiwa miongoni mwa makundi yanayolengwa kunufaika na maendeleo hayo.
Hakuna maoni: