DAR ES SALAAM.
Katika hatua muhimu kwa maendeleo ya huduma za mikopo ya elimu ya juu nchini, Bodi ya Mikopo ya Wanafunzi wa Elimu ya Juu (HESLB) leo imefanya makubaliano ya kubadilishana hati za ushirikiano na Mamlaka ya Mapato Tanzania (TRA). Hafla hiyo imefanyika jijini Dar es Salaam leo Septemba 13,2024, ni sehemu ya jitihada za bodi kuboresha mfumo wa urejeshaji mikopo na kufikia wanufaika kwa ufanisi zaidi.
Katika hafla hiyo, Mkurugenzi Mtendaji wa HESLB, Dkt. Bill Kiwia, alieleza Waandishi wa Habari kwamba makubaliano hayo yanatokana na mahitaji ya kuboresha huduma za mikopo kwa wanufaika wanaoishi katika sekta isiyo rasmi. Dkt. Kiwia alifafanua kuwa lengo kuu la kubadilishana hati hizi ni kuhakikisha kwamba wanufaika wa mikopo ambao hawajarejesha mikopo yao, hasa wale wanaoishi katika sekta isiyo rasmi, wanaweza kufikiwa kwa urahisi kupitia taarifa zinazotolewa na TRA.
Dkt. Kiwia alisema kwamba ushirikiano huu utasaidia bodi ya mikopo kupanua wigo wa huduma zake kwa kutumia kanzidata za TRA, ambazo zitatoa taarifa muhimu kuhusu wanufaika ambao hawajarejesha mikopo yao. Hii itasaidia bodi kupata picha halisi ya hali ya urejeshaji mikopo na kuchukua hatua stahiki za kuwasaka wanufaika hao. Aidha, utasaidia katika kuimarisha michakato ya marejesho ya mikopo na kuhakikisha kuwa wanufaika wapya ambao bado wapo vyuoni wanapata mikopo kwa wakati.
Dkt. Kiwia alisisitiza umuhimu wa wanufaika wa mikopo wa elimu ya juu ambao bado hawajaanza kurejesha mikopo yao kuharakisha urejeshaji huo. Alisema kwamba kupitia ushirikiano huo, bodi itakuwa na uwezo mkubwa wa kusaidia wanufaika wapya na kutoa mikopo kwa wanafunzi wa vyuo vikuu kwa wakati. Alitoa wito kwa wanufaika wote kurejesha mikopo yao kwa wakati ili kuongeza uwezo wa bodi katika kutoa msaada kwa wengine.
Kwa upande mwingine, Kamishna Mkuu wa Mamlaka ya Mapato Tanzania (TRA), Yusuph Mwenda, alihutubia hafla hiyo kwa kutoa pongezi kwa bodi ya mikopo kwa kazi kubwa wanayofanya katika kutoa mikopo kwa wanafunzi wa Tanzania. Mwenda alieleza kwamba mikopo hiyo imechochea maendeleo makubwa katika sekta ya elimu nchini, na alisisitiza kuwa TRA itakuwa mstari wa mbele katika ushirikiano huo kwa kutoa taarifa wanazostahili kupata HESLB kwa mujibu wa makubaliano waliyoyaingia.
Mwenda alifafanua kwamba TRA itaendelea kutoa taarifa muhimu kuhusu wanufaika wa mikopo ili kuhakikisha kuwa mikopo hiyo inarejeshwa ipasavyo.na kuhakikisha ushirikiano huo utasaidia katika kubadilishana uzoefu kati ya TRA na HESLB, na hivyo kurahisisha michakato ya urejeshaji mikopo kwa wale wanaoishi katika sekta isiyo rasmi lakini wana kipato.
Kwa jumla, makubaliano haya yanaashiria hatua kubwa katika kuboresha mfumo wa urejeshaji mikopo na kuongeza ufanisi katika huduma za mikopo ya elimu ya juu. Ushirikiano huu kati ya HESLB na TRA utasaidia katika kuhakikisha kuwa rasilimali zinazokusanywa kupitia urejeshaji mikopo zinatumika vizuri, huku wanafunzi wapya wakiendelea kupata msaada wa kifedha kwa ajili ya masomo yao.
Hakuna maoni: