WATUHUMIWA 15 WAKAMATWA NA TANI 14 ZA NYAYA ZA SHABA ZA SGR; RAIA WA KIGENI PIA WAHUSIKA.

DAR ES SALAAM.

Jeshi la Polisi Kikosi cha Reli limewakamata watuhumiwa zaidi ya 15, wakiwemo raia wa China na Kenya, kwa tuhuma za kuhusika na uharibifu wa miundombinu ya Reli ya Kisasa (SGR). Watuhumiwa hao wanatuhumiwa kukata nyaya za shaba kwenye njia ya reli hiyo na kuziuza kama chuma chakavu.

Kamanda wa Kikosi cha Reli Tanzania, Gallus Hyera, amebainisha hayo Desemba 17, 2024, akizungumza na waandishi wa habari jijini Dar es Salaam. Alisema jumla ya tani 14 za nyaya za shaba zimekamatwa kwenye misako iliyofanyika kwa kushirikiana na vyombo vingine vya ulinzi na usalama.

"Watuhumiwa hawa ni pamoja na mafundi walioshiriki ujenzi wa miundombinu ya SGR, fundi umeme, na wafanyabiashara wanaojihusisha na biashara ya chuma chakavu," alisema Hyera.

Matukio na Kukamatwa.

1. Mdaula, Pwani (Novemba 28, 2024): Watuhumiwa watatu walikamatwa wakiwa na nyaya za shaba kilo saba. Mmoja wao ni fundi umeme wa kampuni ya Yapi Merkezi, inayotekeleza ujenzi wa miundombinu ya SGR.

2. Visiga, Pwani (Novemba 30 na Desemba 2, 2024): Nyaya za shaba kilo 4,570.4 na vipande vya shaba vilivyoyeyushwa kilo 971.5 vilikamatwa kwenye kampuni ya The African Light Investment Ltd, inayomilikiwa na raia wa China na Kenya

3. Kisemvule, Pwani: Nyaya za shaba za Tanesco kilo 608.6, nyaya za SGR kilo 37.6, na vipande vya shaba vilivyoyeyushwa kilo 5,517.4 vilikamatwa kwenye kiwanda cha Metal Chem International Co. Ltd.

4. Mwenge, Dar es Salaam (Desemba 5, 2024): Watuhumiwa walikamatwa wakiwa na kilo 65.5 za nyaya za shaba.

5.Balochistan Group of Industrial (BGI), Pwani (Desemba 13, 2024): Nyaya za shaba kilo 67 na vipande vya shaba kilo 7,728 vilikamatwa kiwandani.

Kamanda Hyera alisema watuhumiwa 13 wamefikishwa mahakamani. Wanane wameshtakiwa katika Mahakama ya Hakimu Mkazi Kibaha kwa makosa ya uhujumu uchumi, na watano katika Mahakama ya Hakimu Mkazi Kinondoni kwa makosa sawa.

Jeshi la Polisi limeonya vikali dhidi ya uharibifu wa miundombinu ya miradi ya SGR na Tanesco, likiahidi kuchukua hatua kali za kisheria kwa yeyote anayejihusisha na vitendo hivyo. Meneja Ishara na Umeme wa Shirika la Reli Tanzania (TRC), Felix Mutashobya, amesema uharibifu huo unaweza kusababisha hitilafu katika mawasiliano na umeme, na kuongeza gharama za matengenezo.

"Matokeo ya uharibifu yanaweza kuwa na athari kubwa kwa usalama na gharama za uendeshaji wa reli," alisema Mutashobya.

Jeshi la Polisi limesisitiza azma yake ya kuendelea kupambana na uhalifu huu na kulinda miundombinu muhimu kwa maendeleo ya nchi.