ZANZIBAR
Chama Cha Mapinduzi (CCM) kimelipuka baada ya kauli za Zitto Kabwe kuonesha mshangao kwa waandishi wa habari, watangazaji, waigizaji na wachekeshaji kuchukua fomu za ubunge.
Katika kikao kilichofanyika Afisi Kuu ya CCM Kisiwandui, Unguja – Katibu wa Kamati Maalum ya NEC Zanzibar, Idara ya Itikadi na Mafunzo, Khamis Mbeto Khamis alimshutumu vikali Zitto Kabwe kwa kile alichokiita “ubaguzi wa wazi” dhidi ya watu wa kada mbalimbali waliotangaza nia ya kugombea ubunge.
Mbeto alisema demokrasia haibagui watu kwa msingi wa taaluma, dini, kabila wala rangi. Alisisitiza kuwa kila mtu ana haki ya kuchagua au kuchaguliwa, na akatoa mfano wa Volodymyr Zelensky, Rais wa Ukraine, ambaye kabla ya siasa alikuwa mchekeshaji na mwigizaji maarufu.
> “Zitto ametoa matamshi ya dharau, kebehi na dhihaka iliyopitiliza dhidi ya taaluma hizo duniani kote. Alichokifanya ni unyanyasaji na udhalilishaji mbele ya macho ya dunia,” alisema Mbeto.
Mbeto aliongeza kuwa CCM ni taasisi kubwa ya kisiasa inayojumuisha wanachama kutoka kada mbalimbali zenye taaluma tofauti, na si chama cha kibaguzi kwa misingi yoyote ile.
Alimshutumu Zitto na viongozi wenzake wa ACT Wazalendo kwa kutumia lugha za kibaguzi mara kwa mara, akieleza kuwa Katiba ya Tanzania inatoa haki sawa kwa binadamu wote kushiriki katika nafasi za uongozi.
Katika kumalizia, Mbeto alimtaka Zitto Kabwe kuomba radhi hadharani kwa waandishi wa habari, waigizaji na wachekeshaji waliodhalilishwa kupitia kauli zake.
#ccm #zittokabwe #mbeto #ubaguzi #uhuruwauteuzi #uchaguzi2025 #zanzibar #waandishiwahabari #demokrasia
Hakuna maoni: