WAANDISHI 64, VYOMBO 11 VYAFUZU KUWANIA TUZO ZA SAMIA KALAMU AWARDS DESEMBA 5


Dar es Salaam, Novemba 17, 2026.

Waandishi wa habari 64 pamoja na vyombo vya habari 11 wamefanikiwa kuingia hatua ya mwisho ya kuwania Tuzo za Uandishi wa Habari za Maendeleo (Samia Kalamu Awards 2026), baada ya kukamilika kwa mchakato wa tathmini uliohusisha kazi 3,003 zilizowasilishwa mwaka huu.

Orodha ya waliofuzu imetangazwa jijini Dar es Salaam na Mkuu wa Idara ya Uhusiano na Mawasiliano kwa Umma wa Mamlaka ya Mawasiliano Tanzania (TCRA), Rolf Kibaja, aliyemwakilisha Mkurugenzi Mkuu wa mamlaka hiyo, Mhandisi Peter Mwasyalanda, katika mkutano na waandishi wa habari uliofanyika katika ofisi za TCRA.

Kibaja amesema kati ya kazi 3,003 zilizowasilishwa, jumla ya kazi 882 zilifuzu kuingia hatua ya kupigiwa kura na wananchi, ambapo kura 317,399 zilipigwa. Ameeleza kuwa waliopenya hadi hatua ya mwisho wamepatikana kupitia tathmini ya majaji 19 pamoja na ushiriki wa wananchi katika mchakato huo.

Amesema tathmini ya majaji ilizingatia ubora wa maudhui, uzingatiaji wa maadili ya taaluma, matumizi ya tafiti na takwimu, athari chanya kwa jamii pamoja na mchango wa kazi husika katika utekelezaji wa Dira ya Taifa ya Maendeleo ya mwaka 2050.

Naye Kaimu Mkurugenzi Mkuu wa Bodi ya Ithibati ya Waandishi wa Habari (JAB), Wakili Patrick Kipangula, amewapongeza waandishi walioshiriki na kuwasisitiza kuendelea kuzingatia maadili, weledi na uwajibikaji katika utekelezaji wa majukumu yao, akieleza kuwa taarifa sahihi zinazozingatia viwango vya taaluma huimarisha imani ya jamii kwa vyombo vya habari. 

Amesema tuzo hizo pia ni fursa ya kutambua mchango na ubora wa kazi za waandishi, maafisa habari na vyombo vya habari.
Kwa upande wake Mkurugenzi Mtendaji wa Chama cha Waandishi wa Habari Wanawake Tanzania (TAMWA), Dkt. Rose Reuben, amesema uteuzi wa waliofuzu ulizingatia ubora wa kazi na vigezo vilivyoainishwa kwenye mwongozo wa tuzo hizo uliowekwa katika tovuti rasmi wakati wa kutangaza nafasi za kushiriki. Ameongeza kuwa kamati ya maandalizi itawasiliana na washiriki waliofuzu kuwapatia maelekezo kuhusu ushiriki wao katika hafla ya utoaji tuzo.

Washindi wa msimu wa pili wa tuzo hizo wanatarajiwa kutangazwa na kutunukiwa Desemba 5, 2026, katika hafla itakayofanyika Ukumbi wa Mlimani City jijini Dar es Salaam, ambapo Rais wa Jamhuri ya Muungano wa Tanzania, Dkt. Samia Suluhu Hassan, anatarajiwa kuwa mgeni rasmi.

Tuzo hizo zinaratibiwa na TCRA kwa kushirikiana na TAMWA na JAB, zilianzishwa mwaka 2024 na hafla ya kwanza kufanyika mwaka 2025, huku kaulimbiu ya mwaka huu ikiwa ni “Kalamu kwa Maendeleo.”

Hakuna maoni:

Inaendeshwa na Blogger.